نئی دہلی،19نومبر(آئی این ایس انڈیا)دہلی کی جواہر لال یونیورسٹی میں ہاسٹل فیس اضافہ کو لے کر جاری مظاہرہ ابھی تھما نہیں ہے۔پیر کو ایک طرف جہاں پارلیمنٹ کے سرمائی اجلاس کا پہلا دن تھا، دوسری طرف باہر سڑکوں پرجے این یو کے طلبہ مظاہرہ کر رہے تھے۔اس دوران دہلی پولیس کے ساتھ طالب علموں کی جھڑپ ہوئی، بہت سے طالب علم زخمی بھی ہوئے۔اب اسی معاملے میں دہلی پولیس نے نامعلوم طالب علموں کے خلاف ایف آئی آر درج کی ہے۔

جے این یو طالب علموں کی طرف سے پیر کو کئے گئے مظاہرے پر دہلی پولیس نے ایف آئی آر درج کی ہے۔پیر کو دفعہ 144 کے باوجود سینکڑوں کی تعداد میں طالب علم سڑکوں پر اترے تھے۔اس دوران پولیس نے لاٹھی چارج کیا، جس میں بہت سے طالب علم زخمی بھی ہو گئے تھے۔قانون کی خلاف ورزی کرنے کے الزام میں کشن گڑھ تھانے میں یہ مقدمہ درج کیا گیا ہے۔اس دوران اپنے مطالبات کو لے کر بات کی جائے گی اور کارکردگی میں زخمی طالب علموں کے بارے میں بتایا جائے گا۔طالب علموں کے مظاہرے کی وجہ سے منگل کو بھی جے این یو کے تعلیمی کام کاج بند رہا۔اس کے علاوہ ایڈمنسٹریشن بلاک میں بھی احتجاج کا اثر پڑ رہا ہے۔